Fyrirsagnir
Notið fyrirsagnir skynsamlega til að gera efni ykkar skipulegt og aðgengilegt. Fyrirsagnir eru á mismunandi stigum, allt frá aðalfyrirsögnum niður í mjög sundurgreinandi millifyrirsagnir. Í verkefnum sem eru en fjórar blaðsíður eða lengri er ástæða til að nota fyrirsagnir, jafnvel á mismunandi stigum. Með lengri ritsmíðum er heppilegt að gera efnisyfirlit. Ritvinnsluforrit gera það á sjálfvirkan hátt.
Í fyrirsögnum er heppilegt að nota aðra tegund leturs en í lesmálinu. Ef notað er krókaletur í lesmálinu skal nota krókalaust letur í fyrirsögnum og öfugt. Í fyrirsögnum á lægsta stigi er heppilegt að nota svipað letur og í lesmálinu, en skáletrað.
Notfærið ykkur stílsnið (styles) í ritvinnsluforritinu til að gera fyrirsagnir.
Á heimastiku forritsins veljið þið stílsnið (styles). Þar eru nokkrir gluggar sem bera heiti á borð við venjulegur (normal) og fyrirsögn (heading). Mikilvægast er að læra að nota sérstök fyrirsagnasnið sem auðkenna fyrirsagnir á mismunandi stigum (Heading 1 til 9). Þið setjið bendilinn í fyrirsögnina í lesmálinu (ekki ljóma neitt) og smellið síðan með músinni á heiti þess sniðs sem við á. Þá fær fyrirsögnin það snið sem þið hafið valið.
Til að breyta stílsniði hægri smellið þið heiti sniðsins og þá opnast ýmsir möguleikar til að vinna með útlit viðkomandi sniðs. Algengast er að fólk velji að uppfæra (update), til samræmis við útlit þess texta sem músin er stödd í, eða breyta (modify).
Leiðbeiningar um notkun Word 2007 við ritun stærri verkefna.